Jahon tilshunosligida semantik kategoriyalarning struktural va funksional xususiyatlarini tahlil qilish, ularning o'xshash va farqli jihatlarini ochib berish, izohlash har bir til nazariy asoslarini takomillashtirishga, yangi tushuncha va atamalarning paydo bo'lishiga olib keladi. Tilshunoslarning tadqiqotlarida milliy til hodisalari va kategoriyalarining struktural-funksional jihatlarini aniqlashga doir izlanishlar olib borish bilan birga, ularni qarindosh bo'lmagan tillar bilan qiyoslash tobora dolzarb boʻlib bormoqda. Bu borada so'zlararo ma'noviy munosabatlarning turli tizimli tillarda semantik va struktural jihatlarini tadqiq etish, ularning oʻzaro munosabatini aniqlash hamda fonologik, leksik, morfologik, sintaktik va stilistik sathlarda namoyon bo'lishini dalillash muhim ahamiyat kasb etadi.