Mazkur o‘quv qo‘llanma “An’anaviy xonandalik” fanining dasturi asosida ishlab chiqilgan bo‘lib, unda fanning o‘ziga xos xususiyatlari, o‘zbek mumtoz musiqasi janrlari, kuylash malakalarini shakllantirish hamda laboratoriya mashg‘ulotlarini tashkil etishga oid metodik tavsiyalar, maqom ashulalari va bastakorlar ijodidan namunalar, asar mualliflari haqida qisqacha ma’lumotlar bayon etilgan. Qo‘llanma, ayniqsa, yosh xonandalar va ularning ustozlari uchun samarali nazariy va amaliy manba sifatida xizmat qiladi. Ushbu qo‘llanma 60110600 – Musiqa ta’limi bakalavriat ta’lim yo‘nalishi bo‘yicha tahsil olayotgan talabalar uchun qo‘shimcha o‘quv adabiyoti sifatida tavsiya etiladi.